DELLES IMPRESIONES DEL 9-M

Posiblemente interpretar los resultaos de les elecciones xenerales pasaes en clave principalmente autonómica o local sía una enquivocación de base nel análisis. A la hora de votar el 9 de marzu pasáu los asturianos atendieron primero de nada a les cuestiones que se discutíen nel ámbitu estatal, nel que la confrontación ente modelos y les diferencies programátiques yeren más patentes qu’en convocatories anteriores. Los asturianos apostaron por un José Luis Rodríguez Zapatero n’estáu de gracia, que fixo bandera de los derechos civiles, la xusticia social y l’asunción de la pluralidá territorial d’España. La incidencia de filies y fobies personales nel escenariu autonómicu, y cueites sin trescendencia más allá del Payares, foi menor. Con too y con eso, delles impresiones sí pueden sacase no tocante a la realidá política autonómica.
La primera d’estes impresiones ye que la fortaleza del PSOE n’Asturies sigue siendo evidente, a pesar del desgaste provocáu por ser el partíu hexemónicu nes instituciones asturianes la mayor parte del periodu democráticu. Davezu tiéndese a minusvalorar a la FSA-PSOE pero, a la hora de la verdá, con tolos defectos que puedan achacáse-y a la estructura orgánica de los socialistes asturianos, los resultaos dan la midida xusta del vigor políticu de caún. Nel casu de la FSA-PSOE, amás, dellos discursos son perfectamente identificables y coherentes: la defensa de los servicios públicos, l’apueste pol desarrollu industrial a pesar de ciertos peaxes medioambientales o la rocea énte los desequilibrios territoriales que pueda xenerar la evolución del Estáu autonómicu. Dellos puntos flacos de la práctica política de la FSA-PSOE, como la posición marcadamente defensiva en materia de desarrollu autonómicu o cierta incompresión énte determinaes movilizaciones sociales, hasta agora nun dexaron nella nenguna marca visible.
La segunda conclusión ye que’l propiu Alcalde d’Uviéu y cabeza de llista del PP al Congresu de los Diputaos asitió imprudentemente nuna posición de debilidá al arramplar con un protagonismu que nun-y correspondía. Los ciudadanos saben perfectamente qué asuntos se deciden en cada elección, y orienten el so votu n’atención a ello, polo qu’existen bien de diferencies ente los resultaos d’unos y otros nes elecciones nos conceyos, autonómiques y xenerales. Sicasí, Gabino de Lorenzo, avezáu a ser el neñu nel bautizu, la novia na boda y el difuntu nel entierru, planificó la so campaña electoral como si’l candidatu principal fora él, dispuestu a protagonizar la escena (a tolos niveles), y a facer porque too s’interpretare en función de la so manera de dicir y facer. Ente la ocurrencia teatral y la incoherencia política, incluyida la so sobrevenida defensa de «los bables» depués de 17 años d’inactividá nel conceyu na promoción de la llingua asturiana, púnxose él solu nel disparaderu. Nun va ser el Presidente del PP d’Asturies, nin candidatu a la Presidencia del Gobiernu del Principáu, y, como la edá nun perdona, a pesar de la so sólida base electoral n’Uviéu, más temprano que tarde ha planificar la so retirada de l’Alcaldía.
P’acabar, la tercer conclusión ye l’absoluta irrelevancia del asturianismu políticu organizáu, por llamalu asina. Na mio opinión, puede exercese militancia asturianista, si por asturianismu entendemos la convicción nel autogobiernu d’Asturies y l’enfotu nes sos propies posibilidaes, de munches maneres y n’ámbitos estremaos. Los partíos políticos que quixeron sostenese principal o exclusivamente sobre esti distintivu, dende’l rexonalismu al nacionalismu, fracasaron ún depués d’otru nos últimos trenta años, ente escisiones y torpeces varies. Quien dende otros ámbitos (primero Izquierda Xunida y depués dellos sectores del PP) fixeron guiños asumiendo elementos del discursu de les organizaciones polítiques extraparlamentaries comprobaron la ineficacia electoral d’esta estratexa. Mentes n’otros ámbitos, como’l de les organizaciones sociales o el de la creación cultural, l’asturianismu sí algamó un grau d’éxitu y afectu ciudadanu considerable, apurriendo amás aire fresco a una Asturies necesitao d’ello, nel planu estrictamente políticu nun se puede dicir qu’exista un electoráu qu’única o principalmente se defina como asturianista, de mano porque los partíos políticos que capitalizaron esta etiqueta cayeron davezu nun victimismu infundáu dirixíu a alimentar una dinámica de desconfianza que cuasi naide comparte: Asturires ye una comunidá privilexada a les clares por España, dende les balances fiscales al gastu por habitante, y va siguir siéndolo mentes exista ciertu conceptu de solidaridá territorial.
Otru debate, ta claro, ye si los asturianos fuimos quien a aprovechar les ventayes apurríes, y si nos nuestros fracasos nun tendrán responsabilidá, en bona midida, les nuestres limitaciones pa ser conscientes de la relevancia del nuestru autogobiernu y la nuestra capacidá pa tomar decisiones por nosotros mesmos.

Versión en llingua asturiana. Publicado en Les Noticies, 15 de marzo de 2008.