ASTURIES

Caltiénse ente munchos asturianos una visión de la realidá de la nuestra Comunidá cargada d’escepticismu, heriede del enraigonáu pruyiciu que nos a?os 80 y 90 caltrió nel ánimu de la ciudadanía, como consecuencia inevitable de la tru?ada de la reconversión económica y les sos secueles sociales. Contrasta la mentada percepción col discursu optimista y esperanzáu que manexa davezu’l Gobiernu asturianu, criticáu —n’ocasiones mui duramente— por tresmitir un mensaxe de superación de la crisis y d’apertura de caminos nuevos de progresu p’Asturies.
?Qué dicen les cifres? Indiquen que lo andao nestos últimos a?os ye netamente positivo y que, ciertamente, tamos yá llo?e de los peores momentos del axuste económicu. El nivel d’empléu recuperóse y sobrepasó los 400.000 ocupaos; el ciclu de crecimientu económicu continuáu supera la década; l’incipiente puxu de la iniciativa privada suplió’l descensu de l’actividá de les empreses públiques —anta?o dominantes—; y, sobre too, la nuestra estructura económica axustóse a los patrones habituales del nuestru entornu, con un notable desarrollu del sector servicios al tiempu que l’actividá industrial sigue calteniendo un papel mui destacáu. Ensin caer na autocomplacencia, sí hai espaciu pa cierta satisfacción. Poques rexones del mundu carecieron simultáneamente y nun espaciu de tiempu tan curtiu una crisis multisectorial tan grave como l’asturiana: minería, siderurxa, sector naval, mediu rural, sector pesqueru, etc. Depués d’un esfuerzu colectivu descomanáu —sobre too nel encaxe y aguante de les etapes de recesión— y col imprescindible sofitu económicu del Estáu y de los fondos de la Unión Europea, cabe afirmar que la etapa de crisis puede dase por concluida y que, amás, Asturies nun dexó pel camín les sos aspiraciones de cohesión social o defensa de los servicios públicos, sobre too si nes dos materies nos comparamos con otres Comunidaes Autónomes. Agora bien, dalgunes repercusiones de la fonda crisis vivida tovía recamplen no económico, no social y, sobre manera, no político.
Si tovía predomina un aquello d’aburrición ente una parte importante de la sociedá asturiana, hai que plantease, cola calma qu’ello requier, les causes que la motiven. Quiciás los asturianos avezamos a torcer el focicu cuando falamos de la situación de la nuestra tierra. Puede ser que la inercia de los a?os difíciles namás desapareza definitivamente cuando nos deamos cuenta de que’l tragu más amargu, ensin dulda, yá pasó. L’ánimu colectivu va tener otra brenga cuando toda desafección o disconformidá se tresforme non nel llamentu recurrente nel qu’atesoramos una llarga experiencia, nin na permanente imputación de responsabilidaes a terceros —incluyendo les nuestres propies instituciones d’autogobiernu—, sinón nel compromisu cola colectividá y el convencimientu de que caún ta llamáu a poner dalgo de so parte.
A día de güei, munchos asturianos siguen sin ser conscientes de que la propia sociedá asturiana, ye quien, en bona midida, pa tomar decisiones por sí mesma, al traviés de les sos instituciones d’autogobiernu, que van influyir de manera decisiva nel nuestru futuru. La sensación de dependencia d’otros factores externos sigue siendo mui alta, y si bien na dómina de la globalización nada de lo que suceda fuera de les nuestres fronteres nos ye ayeno, a la hora de la verdá va depender de la nuestra reafirmación y determinación si somo suxetos activos o pasivos de los cambios del nuestru tiempu.
Nesi procesu xuega un papel fundamental la interiorización y plena asunción de lo que representa l’autogobiernu actual —y futuru— pela parte de la sociedá asturiana. El nivel de conocimientu y seguimientu que la sociedá asturiana tien o realiza no tocante al devenir de les sos propies instituciones d’autogobiernu ye, a les clares, inferior a lo deseable. Incluso voces mui autorizaes —como por exemplu’l politólogu Óscar Rodríguez Buznego— apunten qu’existe na sociedá asturiana una cierta insuficiencia de capital social o masa crítica capaz de promover una mayor implicación nos asuntos públicos al traviés de les sos expresiones asociatives y de la xeneración de corrientes d’opinión nueves. N’apariencia, resulta más cómoda una posición un tanto victimista allancada nuna realidá que yá nun ye tala, en comparación col esfuerzu qu’esixe comprometese p‘aportar, en positivo, a la construcción de lo que, los más entusiastes de la tresformación en cursu, apelliden nueva Asturies.
Tampoco nun se puede obviar que munchos protagonistes de la vida política autonómica son, en bona midida, corresponsables de la so insuficiente imbricación ente la sociedá asturiana y les sos instituciones d’autogobiernu. D’una parte, nun contribuyeron a ello les importantes limitaciones pa innovar discursos, el caltenimientu a lo llargo de los a?os de planteamientos un tantu cortoplacistes aferraos a la xestión de la crisis, asina como cierta rixidez de la estructura y dirixencia nes élites polítiques, sindicales y empresariales d’Asturies. D’otra parte, la falta d’entusiasmu autonomista —una vuelta qu’echó a andar y consolidóse la nuestra Comunidá Autónoma como tal—, namás iguáu en parte depués de la última reforma del Estatutu, tampoco nun inyectó especiales ánimos a la ciudadanía p’averase a conocer y participar activamente nel debate públicu. A la fin, les repetíes crisis institucionales d’Asturies na década de los 90 ufiertaron una imaxe nada edificante de l’actualidá política autonómica: dimisiones de gobiernu, presidentes reprobaos o desautorizaos pola mayoría parlamentaria que nel so momentu los aupó, etapes de paralización lexislativa, etc.
Por suerte nel momentu actual la normalidá institucional alicó dende va unos a?os, al empar que s’afondaba nel autogobiernu d’Asturies, pero, ha tenese en cuenta, esta situación nun había ser la excepción sinón la regla. Y la serenidá que permite’l desarrollu de la xestión pública y los proyectos del gobiernu correspondiente tampoco nun va ser abondo si, como indicaba va unes selmanes el Rector de la Universidá d’Uviéu, Juan Vázquez, los bonos resultaos d’esa xestión nun vienen acompa?aos de la tresmisión de confianza a la sociedá nes sos propies posibilidaes, exerciendo un lideralgu políticu que s’echa en falta n’ocasiones.
Asturies, polo tanto, sigue necesitando un refuerzu na so autoestima, recobrando plena conciencia de les sos propies capacidaes. Esti procesu —que los llatinoamericanos llamaríen descriptivamente «d’empoderamientu»— sólo ye plenamente posible, nel ámbitu políticu, con un averamientu paralelu de representantes y representaos. Ye hora de plantear seriamente tanto nos conceyos como, sobre manera, a nivel autonómicu, la necesidá d’articular preseos más eficientes de participación ciudadana nos debates previos a la toma de decisiones públiques. Ye preciso potenciar la tresparencia y la dación de cuentes —más allá de lo esixío hasta agora— como pautes habituales de los diferentes gobiernos locales y autonómicos. Y, sobre too, resulta oportuno asentar y culminar plenamente’l desarrollu del nuestru marcu competencial y institucional, al tiempu que s’abre —ensin aplazamientos nuevos— la reforma del Estatutu. Nesti procesu, hai que crecer en competencies que tán llamaes a ser exercíes pola Comunidá Autónoma y, n’especial, hai que perfeccionar el nuestru entramáu institucional pa facelu más eficaz y representativu. Va ser inaplazabe, amás, en cuantes que s’abra’l debate estatutariu, algamar una regulación consensuada del réxime de la realidá plurillingüística d’Asturies, de forma que, sía cuál sía la denominación escoyida pa designar l’estatus de la llingua asturiana y la fala del Navia-Eo o gallego-asturianu, y sían cuales sían los límites, plazos y cauteles que s’establezan al respecto, quede aseguráu como principiu básicu’l plenu respetu a los derechos llingüísticos de tolos asturianos y a la voluntá individual de caún d’utilizar la llingua que crea oportuna tanto na esfera privada como na pública. La trayectoria recorrida nel periplu autonómicu d’Asturies, pesie a notables subíes y baxaes, resultó en términos xenerales mui positiva. Pero les carencies detectaes y la relativa languidez social y política que s’aprecia han llamanos a la reflexón y, consiguientemente, a l’acción. Namás d’esta forma vamos poder seguir avanzando como Comunidá nun marcu d’importantes cambios institucionales, económicos y políticos, que nun van a esperar a que nosotros nos decidamos pa desplegar, dende yá, los sos efectos.

Versión n´asturianu. Espublizao en Les Noticies el 26 de xineru de 2006.