UVIÉU

Uviéu ye la capital alministrativa y institucional d’Asturies. Una verdá de Perogrullu. Pero, ?ye la capital social, económica, cultural y política d’Asturies? ?Tien de selo? ?Qué significa güei capitalidá? Vamos esbillar dalguna de les respuestes posibles.
Uviéu concentra la mayor parte de la estructura alministrativa del Principáu d’Asturies y de l’alministración periférica del Estáu na nuestra Comunidá. Acueye amás la mayor parte de los centros y l’alministración de la Universidá. Alredol d’esta circunstancia creóse históricamente una rede de servicios venceyaos a l’actividá alministrativa y universitaria —y a la importante cantidá de personal qu’acarreta— que traxo una serie de ventayes sociales y económiques pa la ciudá nada desde?ables. La configuración histórica d’Uviéu como centru de poder eclesiásticu —nel so tiempu mui relevante, güei cuasi anecdóticu—, universitariu y alministrativu permitió-y esfrutar d’una posición de privilexu nel marcu asturianu. Como amuesa de les repercusiones d’ello, nun ta de más destacar que mentes el restu d’Asturies tuvo que superar, con bien de dificultaes, una fonda crisis de los sectores económicos tradicionales —minería, siderurxa, construción naval, actividaes agropecuares—, el conceyu d’Uviéu en nengún momentu careció cola mesma fuerza l’emburrión de la reconversión y les sos derivaciones sociales. En términos xenerales, esta ventaya comparativa subsiste n’actualidá, quiciás dalgo amenorgada por una concepción menos centralista de la organización alministrativa, pola dispersión de la Universidá en Mieres y Xixón, y sobre too pol puxu creciente d’otros conceyos del propiu Área Central d’Asturies. Pero la ventaya qu’había de mano subsiste.
Los beneficios de la capitalidá, almitíos con bona cara pola gran mayoría d’asturianos, y soportaos con estoicismu y deportividá por otros conceyos, tienen con too un oxetivu que s’escaez munches veces. Quien esfruta d’esa posición tien que saber devolver al conxuntu los frutos que s’algamen a resultes d’esa situación de privilexu, porque la centralidá qu’apurre la capitalidá nun ha suponer una plácida conformidá o un fin en sí mesmu. La condición de capital, o implica lideralgu o conviértese nuna carga pal restu de los territorios. Si amás l’exerciciu de la capitalidá se fai dende l’altanería y l’enfrentamientu pela parte de los responsables del conceyu, cosa habitual a día de güei, nun s’incumple namás el deber que comporta tala responsabilidá, sinón qu’amás erosiónase notablemente’l proyectu conxuntu d’Asturies; pásase entóncenes del aprovechamientu en beneficiu común de les ventayes otorgaes, al puru ventayismu y la xestión del privilexu «pro domo sua».
?Aprovechó Uviéu la condición de capital? ?Revirtieron les ventayes algamaes por ello nel restu d’Asturies? Los carbayones hemos ser autocríticos al responder a estes preguntes. Porque mentes el restu d’Asturies cambió, y muncho, nos últimos a?os, la posición d’Uviéu sigue siendo, en xeneral, la mesma. Los conceyos de l’arredolada, o superaron en bona midida la crisis minerosiderúrxica (les comarques del Caudal y el Nalón, Xixón o la comarca d’Avilés) o surdieron con puxu na escena económica d’Asturies (por exemplu la exa Siero-Llanera). Los movimientos sociales, les experiencies de participaación ciudadana, l’actividá cultural popular —non elitista— y les manifestaciones nueves d’iniciatives creatives, tienen más presencia n’otros sitios, non tanto porque tengan más fuerza —que quiciás tamién—, sinón sobre too porque consiguen influyir nel discursu propiu de la ciudá y inclusive na axenda de preocupaciones de los gobernantes. Uviéu sigue esfrutando d’una situación tranquila y los númberos de la ciudá siguen siendo los meyores en renta, crecimientu de población, seguridá, etc. Pero’l rendimientu que se pue algamar de la capitalidá alministrativa ye cada vez más peque?u, les estratexes de futuru son mui poques (nun se vive namás del turismu y l’aparente aguapamientu estéticu), y les consecuencies del menor dinamismu social y políticu principien a ense?ar la patina perbaxo la puerta. Al empar, munchos asturianos ven con preocupación cómo la exhibición de la capitalidá se fai namás pa pedir recursos públicos, nunca pa proponer, discutir o ufiertar.
El problema ye que’l discursu oficial d’Uviéu esculpió a concencia una imaxe distorsionada de la ciudá. Uviéu nun ye namás la ciudá palaciega de l’apariencia, les estatues, les ínfules imperiales, les llamentables evocaciones del llamáu «cercu» o el caudillismu d’ayer y de güei. Uviéu ye tamién, y sobre too, una ciudá con barrios enllenos de personalidá y aspiraciones, con xente mozo cargao de proyectos sociales, empresariales y culturales baxo’l brazu, y históricamente, amás, tamién foi una ciudá na que l’espíritu críticu y lliberal brilló con Clarín, la extensión universitaria o el grupu del 98 (Posada, Álvarez-Buylla, Sela, Canella, etc.)
La llábana del pensamientu únicu localista en medios de comunicación y responsables municipales al referise a Uviéu pretende afogar o amenorgar adréi otres expresiones y realidaes que, anque cafien a dalgunos, siguen latentes na ciudá. Proyectóse testeronamente dende’l poder local una imaxe d’Uviéu na qu’una montonera de carbayones nun se sienten reflexaos, pero qu’otros, a fuerza de repetición, acabaron por asumir. L’arguyu del llinguaxe oficial qu’expresa satisfacción pa col estáu actual de coses nun tien que ver cola autoestima —necesaria— y el sentíu de pertenencia a la ciudá —imprescindible—, sinón que se parez muncho a un conformismu da?ín, a un indisimuláu despreciu pol entornu que nos arrodia, a un desconocimientu de los vientos nuevos de la globalización, y, en definitiva, a una miopía inquietante. Anque’l problema vaya más p’allá del gobiernu del conceyu, rescampla que’l llargu mandatu de Gabino de Lorenzo na Alcaldía, el so personalismu inconfundible, el so dominiu de la escena institucional y mediática, y les maneres que destila, contribuyeron a sorrayar el protagonismu d’esi Uviéu anticuáu con una noción de la capitalidá tan centrada en mirase l’embeligu como nel cortoplacismu. Lo que tien de dar pie a una reflexón fonda nos sectores progresistes y lliberales —nel meyor sentíu del términu— de la ciudá ye cómo una persona con un bagaxe tan ramplón como’l del Alcalde consiguió prácticamente monopolizar l’espaciu políticu local a lo llargo de 16 a?os.
El resultáu d’esti proyectu ye qu’esti Uviéu unidimensional y que se recrea ente les sos cuatro parés pierde fuerza, influencia y capacidá de puxu no social, no político, no cultural y no empresarial. Y les repercusiones (tamién les resistencies) a diario nos carbayones empecipien a aparecer, sobre too nos sectores menos favorecíos y na población xoven, que se mueve per caminos diferentes a los que marca l’asfixante discursu oficial.
Al mio paicer la ciudá d’Uviéu pue alcontrar brenga nuevo si busca la so fortaleza na cooperación colos conceyos, la bayura interna y el compromisu activu col restu d’Asturies. Uviéu tien d’exercer una capitalidá responsable, un lideralgu dialogante col entornu, participando como’l que más nel proyectu asturianu, sin remilgos nin egolatríes. La rede de poderes locales tien de ser signu distintivu del panorama institucional y políticu asturianu, y Uviéu ha formar parte d’esi ensame, capitaniándolu con más «auctoritas» que «potestas». La identidá asturiana ye una suma d’identidaes y pertenencies, tamién de caráter local, y de nenguna manera una contraposición o rozadura d’estes. Ello ye que nun va haber una Asturies fuerte si Uviéu y, sobre too, los responsables del conceyu, xiblen tangos o se miren nel espeyu.

Versión n´asturianu. Espublizao en Les Noticies el 19 de xineru de 2007.